Krinkje Spijen

Ien Pieterziel Bietn zaoien……. Natied - NOW Dit liekt wel n vervolgverhaal te worren. Ien zeker zin is dat ook zo. Dit veurjaar hemmen joe lezen en op kiekjes zien kint, dat Kavedebee ien zien zwit (gien bloed, veur zover ik wiet) en meschien wel met tranen in zien ogen, omdat e nogal slim kuren môs waar e volgende rieg kommen môs, zien bieten zaaide. Offisieel komt dan de tied van t verplegen van t gewas. Daaronner valt dat er kunstmis over streut wordt en dat dee e. Nadat de plantjes boven kommen warren himmen ze der n boel wark van had om ze op enen te kriegen en t onkruud de baas te blieben. Van n ôfstand zien, het sums e hele femilie metholpen, veural 's abens na zes uur. Din komt de tied dat e bieten groeien moeten en dat himmen ze zo te zien ook wel deeglijk daan. Ze himmen genoten van hitte en ze himmen bij tieden ook veul regen op e kop had. Op e duur wordt et tied veur e oogst. Ruum vittien dagen leden binnen ze met t reuden van e bieten begonnen. Zoas we dit veurjaar al dochten: niks geen grote mesiene op t land. En Kavedebee mag din n nuver lapke bieten himmen, zon groot apparaat, as zon mesiene is, zôl er zien kont niet keren kinnen. ( Niet zo netjes zeit, wel? Maar t steit nau n keer). En dat ding zol t bieteloof ook maar vermotjakken, schanne toch. Dat konnen eigen koeien en die van vrienen ja wel opvreten. Dus môssen kopschoffel en bietetang uut t vet. Reude bieten en t loof kwammen ieder op hur eigen bultje te liggen. Bieten werren met e vörk op e wagen prikt (môg dat vroeger wel? Dèrveur ha je toch bietegrepen?). As wagen vol was din sjôrde trekker em naar e bult. Leegmaken dee e trekker, anners har e mar gien ôftakas kriegen moeten. Wat zeggen jim mar? Disse zelde trekker met zien wagen ston n dag later op t land met slootreit er op. Zol dat over e bietebult moeten? Dat zôl ja weer net weden as vroeger, reit op biete-en eerpelbulten. Mar met n verschil, en verschil moet er weden, zeggen ze toch? Dat verschil is, dat et reit vroeger opsneden wer met e reitsnieder, n klein soort seintje (zeisje). Dan bleef e reitstengel heel. Reit kwam dan net zo as t groeid was om e bult, t blad naar boven. 't Water, van e regen, kon er din zo bij del lopen, bieten (en ook eerpels) bleben dreug, (eerpels werren ook niet zo gauw groen) en t keerde ook nog wat de kôlle ien e harstnachten. As t din echt winter wer, din wer er modder op dat reit brôcht en as t neudig oordeeld wer, wer der nog weer reit oplegt en nog keer n laag grond. Om reden dat je grond neudeg warren kregen je as van zels n geut om e bult. Daardeur bleben bieten en eerpels nog beter dreug. Zon geutje zellen we nau, dink ik, niet zien. Niks geen modder graven ien dis tied. 'n Stuk plestik, of n plestik kleed er over hin en klaar is kees. Zo, dat was t loon naar (en na) werken: de oogst. Op n beetje na (trekker met zien wagen) allegaar handwark. Nau môssen er eigeluks nog twee peren (liest belgen) op et toneel verschienen met n ploeg om t land op wintervurg te leggen. (Uit: Het werkpaard, W.Romijn) Mar hest et nog niet docht, of ……… Potverjoppie, bieten en loof binnen nog maar krekt van t land ôf en daar hest al zon dik beest van n trekker (n echte duutse Fendt) met n waarachjes gien klein ploegje der achter, n dikke vierschar. Zel ook wel vrienendienst weden, mar dat geft toch niks? Ien n vloek en n zucht leit die t bieteland op wintervurg. Is nau tied veur "na gedane arbeid is t goed rusten?" Laat de winter maar kommen. Femilie Kavedebee bedankt veur t aanschauwelijk onnerwies, dak van joe kregen heb. Al t ôlle kwam nog eben weer bij mij boben. 'k Heb er van genoten, zunder der van te zwitten en eelt er van ien e hannen te kriegen. As bliek van die dank nog n kiekje van de dikke voerbieten, de bult, de zelflössende wagen en jim John Deere (trekker). Terug naar Grunnings