Krinkje Spijen

Ien Pieterziel Diefke en diefkesmoat - Lammy Kingma en Geert Zielstroa Kees Kingmoa idn rieke kerel. Hij het weer twee fietsen. Nou zellen jim wel denken "Ben je riek as je twee fietsen hemmen, der binnen vanzelfs genog minsken met 2 of miskien nog wel meer fietsen". Dat is ok woar, moar d'r steit ok niet veur niks 'weer'. Doe Lammy en Kees op zundagmorregn wakker mokt werren deur t lutje hondje Iris was t mooi weer. t Zontje scheen, het waaide host niet en Lammy zee: " We goan moar op fiets noar kerk Kees!". Kees schoof e knup van e strik nog eemen recht en vond wel goed, hij mog ja wel groag fietsen. Lammy kreeg heur doamesfiets van stal en Kees ston eemen te twiefeln. Zol der op zien gewone fiets goan of zol er 'Lucas' metnemmen. ' Lucas' is n gewone olle grieze herenfiets moar veur Kees was der slim biezunder. t Brikje war nog van Kees zien schoonpabbe west, doarom hiet r ok 'Lucas'. Tis moar idee natuurlieks, moar Kees zol bot wenstig worren as 'Lucas' der niet meer was. 't Spultje reisde oaf noar Pieterzijl woar de fietsen noast de kerk del zet werden. Domnee preekte best en Kees genoot tot aan t enne. Hij praote nog eemen noa, draaide n sjekje en keek noar e stroalende blauwe lucht. Wel zol hem vandoag nog wat doen! Doe liep er met Lammy noar buuten en zag ieneenend dat Lucas niet op t olle plak ston. De fiets was nargens te vienen, ok niet noast de kerk, niet ien e sloot doar tegnover, gewoon vot, stolen vanzelf. En dat ien Pieterziel en dat bie de kerk, is der dan niks meer heilig. Mantje werd al droa oardig nustig en lopt noar Lolke Vervat, die vlak bie kerk woont. Hij har lestdaogs Lolke zien klompen verstopt en nou denk t er dat Lolke hem te pakken het. Hij doar hinne moar r is gien kop te bekennen en hij zicht e fiets niet stoan, dus dan moar lopend noar huus. 't Zit m toch niet lekker, doarom belt Sherlock Holmes moar eens eemn noar de overburen van e kerk, Geert en Grietje Zielstroa. 'Joa met Kees, ik ben mien fiets kwiet roakt bie de ker, hes tok wat vrumds zien': vragt der. 'Joa' zegt Grietje' ik heb aal wat zien, moar ik denk wel dast de fiets weer terugkriegst'. Ze zeit hem niet wel ze zien het, moar Kees kniest al weer wat. Kees het lol want hij wiet nou wel host zeker dat Lolke zien fiets metnommen het. Moar moandag is e fiets nog niet terug. 's Oamens geit Kees altied noar de gimmestiek en hij vragt veur alle zekerheid nog moar weer es aan Grietje wel zien fiets stolen het. Die geft gien krimp en dan moet Grietje heur dochter Regina veur 't verheur. De bakvis wer der kant benauwd van t verheur van Kees en keek moar noar de grond, ze haar het zwit veur de kop. Gelukkig krigt Kees ieneenend telefoon en is t wichtje red, moar Kees war niet veul wiezer en har nog steeds gien fiets. Op dinsdag geit r toch moar noar 't pliezieburo en dut aangifte van t verdwienen van e fiets. Hij wer allervrundeliekst ontvangen en zien 'kwestie' wer prezies op papier zet. De pliezie tikt aan e pet, Kees zol der nog wel van heuren. De vaste agent van Pieterziel en omstreken har nau gien dienst, moar die zol t wel onnerzoeken. De doagen verstreken, Kees sliep min van onwennigheid want nou was r pabbes fiets kwiet en ree voak langzoam deur t dörp en dan draaide de kop hem op e romp. Op dunderdagmiddag stop r n politieauto en komt agent Ids Walda het hiem op. "Ik wol moar es eevm kieken of Kees al weer wat van e fiets heurt het": zeit er as r binnen komt. "Nee" , zeit Kees, "doar moest doe achteraan, bist doe nou een pliezie?". Ids begunt te lachen en Kees word al n bietje nustig, hij vient der niks grappigs aan. 'k Zil e papieren der moar eemen bie hoalen zeit de politie en komt loater weer terug met n beste stoapel papier. " Der word hier ien Pieterzijl nogal wat oafstolen!" : zeit Walda. Hij pakt een van zien blatjes en leest veur. "Lolke Vervat is n poar klompen kwiet. Hij was bei dien broer Eddy en toen r noar huus wol wadden zien klompen vot. Hij is moar op zien sokken noar huus goan. Peter Stuut krekt t zelfde verhoal, die is al n poar keer zien klompen kwiet west. Jop Blom zien beste pet is lestdoags ien kerk verdwenen en bie Eric Wierenga bennen de boodskappen uut e kofferbak verzwonnen". Kees krigt het ien eenend deur. Alle 'zaken' van Walda het hij om maans hat en nou hemmen ze hem bij de poot. Lammy en Walda kniezen zich dood as ze hem zien gniffelen. " Jem dikke bliksems": zeit Kees, " Jem hemmen mien fiets pikt". En met komt Lolke Vervat op Lucas het hiem op reeden. "Hast helemoal geliek Kees" : zeit Lolke. " Ik heb Lucas zundag bie de kerk weghoald en goed verstopt. Konst hem mooi niet vienen. Dit zil die leren om van annermans spul oaf te bliemen". Ze hemmen nog heel gezellug buuten zitten te koffiedrinken en Kees het 's aovens moar eevm lekker een Beerenburgje mit suuker nommen om et te vieren. 't Sloapen ging die nacht ok al oardeg beter. Diefke of diefkesmoat, ze binnen beide lieke slim, moar of Kees der wat van leert het, leuv der niks van. Hol jem fietsen en klompen moar in huus, want zien oogjes glinsteren mie veul te bot. 'Schier fiets, niet!'                                                          İGert Sennema, Griepskerk Lolke en Lucas, zunner klompen Terug naar Grunnings