|
Ien Pieterziel
't Leste Nijsblad - Geert Zielstroa
"Ik ben vot hur!": ik steek mien kop eemn om e hoek van e keuken, wer mien moeke eerpels aan t schillen is. "Nemst t buske met noar Meijer en dust doe vanmiddag de kraant". Ze stopt n rieksdoalder ien t vief liter melkbuske en laankt mie hom aan. "'k Ben der met twinneg veur viefs trein weer, dan ken ik de kraant wel metnemmen": zeg en ik hoal mien fiets uut t schuurke.
Die jongen uut Stroobos kommen der al aan en k wacht op bie onze dampoalen. De trein noar Leeuwarden riedt net vot van Visvliet, dan moet we knap aan fietsen, want anners ben we weer es te loat. 't Waait niet zo botte hard en we rieden eemn loater al op Stationsweg. Vlak veur boer Meier trap ik wat harder deur en zet het melkbuske om e hoak van e stal. Vanmiddag is der weer vol en dan ken k hom weer mitnemmen.
Ik pik weer aan ien t riegje fietsers en we sloan de hoek van e gracht om. Verrek die olde stationswachter het e hekken al dicht doen en e trein is nog niet eens op t Sarabos. We smieten de fiets teegn het hek van t Witte Huuske en kruupen achter de hekken laangs t perron op.
De fietsen huffen niet op slot want Vrouw Visser hoalt de fietsen der wel weg vanmiddag. Op vrijdag moet we de stalling betoalen en dan wil ze der wel eemn veur lopen.
Alle bekende gezichten stoan al bie t spoor en as de deuren open sissen, zoekt elk n een n plakje in e halflege trein. Griepskerk, Zuudhorn, eemn anhollen in e bocht bij Vierverloaten en dan riedt e trein al onner Emmaviaduct deur Grunnen ien. Dan is t nog twinneg minuten lopen noar schoel aan e Hofstraat. Soamen met t wichtje van Tjoelker uut Griepskerk lopen we snel t station uut..
Om twinneg over drie goan we anner kant weer op. As k deur de hal van t olde station loop heur ik t al: "Voor de reizigers die net zijn aangekomen met de Intercity uit Zwolle, de trein naar Leeuwarden staat gereed op perron 3a". Die omroeper is n echte Stadjer, dus de A is wel 6 aaaaaas lank.
Trug op Station Visvliet draait chef Stoker aan zien slinger om e spoorbomen omhoog te doen. "Krant zitten al achter t blok": zeit er. Ik doe de zwaore deur van zien hokje open en stap noar binnen waor t kolenkacheltje nog lekker snurt. Stoker het zien waark doan en komt ok binnen.
"'t Is een van e leste maolen, Geert": zeit er, "Nije week is t doan mit station Visvliet, dan is der gien chef meer en kennen jem allenig nog moar ien e wachtkoamer". "Ze brengen t Nijsblad dan bie boer Meijer an, dêr kist hem weghoalen". "Vanmiddag hadden ze al n krant minner an brocht, k heb jemmend eemn lezen, vandoar dat er wat kreukelig is".
"Veur die vieftien reizigers ken t ok niet langer, Stoker": zeg ik, al vien k t jammer dat er straks gieneen is om mit te proaten en n sjekje te smoken. "Nou ik ga moar noar hus Stoker, ben je der Mörgen ok nog. Hij knikt eemen en ik loop noar vrouw Visser, die al met e fiets aan e hand buuten steit. "Ik docht al, zol er niet met kommen weeden, moar bist der toch nog". Ik geef heur moar snel mien gulden en steek de krant onner e snelbienders en rie vot.
Bie boer Meijer stop ik twee kranten ien e bus. De een is veur de jonge boer en d anner veur de olde boer, die noast e ploats in n caravan woont. Ik pak t melkbuske achter de deur weg en steek mien hand op naor de olde boer, die uut t melkenshok komt.
Ik rie verder noar e boerderij van Besling wêr n koppeltje studenten wonen. Die kriegen ok n krant en dan hol ik der nog twee stuks over. Bij ons thuus stop ik een ien e bus veur buurman Foppo, die hoalt m noa t melken zelf wel op.
De leste krant is veur ons zelf. Met de schoeltas op e rug en t buske ien e hand, doe k de veurdeur open en loop e keuken ien.
"Steit der nog nijs ien krant": ropt Moeke vanuut de koamer.
"Dat zil wel, anners wast ja gien Nijsblad": zeg ik en smiet krant op e toafel.
Terug naar Grunnings
|
|